काठमाडौं – प्रतिनिधिसभाको बिहिबारको बैठकमा नेकपा सांसद युवराज दुलालले गणेश नेपालीले राहदानी वितरणमा भएको ढिलाइका कारण आत्मदाह गरेको दाबी गरेका थिए। तर केही घण्टामै सम्बन्धित सरकारी निकायहरूले उक्त दाबी तथ्यसँग नमिल्ने स्पष्ट पारेका छन्।

राहदानी विभागले जारी गरेको स्पष्टिकरणमा गणेश नेपाली राहदानीसम्बन्धी कुनै सेवा लिन विभाग पुगेकै अभिलेख नभएको जनाएको छ।

त्यसैगरी, नेपाल प्रहरीको प्रारम्भिक अनुसन्धानअनुसार निषेधित क्षेत्रमा पार्किङ गरिएको मोटरसाइकलमा काठमाडौं महानगरपालिकाले ह्विल लक लगाएपछि उत्पन्न विवाद र मानसिक तनावका बीच उनले आत्मदाहको प्रयास गरेका थिए। उपचारका क्रममा शुक्रबार वीर अस्पतालमा उनको निधन भएको प्रहरीले जनाएको छ।

यसैबीच, सामाजिक सञ्जालमा ट्राफिक प्रहरीले जरिवाना तिराएकै कारण घटना भएको भन्ने दाबी पनि काठमाडौं उपत्यका ट्राफिक प्रहरी कार्यालयले अस्वीकार गरेको छ। कार्यालयका अनुसार घटनालाई लिएर फैलाइएका त्यस्ता दाबीहरू तथ्यमा आधारित छैनन्।

यस घटनाले संसदमा उठाइने संवेदनशील विषयमा तथ्यको पुष्टि, अनुसन्धानको अवस्था र आधिकारिक जानकारीलाई आधार बनाएर अभिव्यक्ति दिनुपर्ने आवश्यकता पुनः स्मरण गराएको छ। संसद देशको सर्वोच्च विधायिकी मञ्च भएकाले त्यहाँ व्यक्त हुने प्रत्येक भनाइले जनमत र सार्वजनिक विश्वासमा प्रत्यक्ष प्रभाव पार्ने भएकाले अपुष्ट सूचना वा अनुमानका आधारमा टिप्पणी गर्नु जिम्मेवार संसदीय अभ्यास मानिँदैन।

घटनाको विस्तृत अनुसन्धान जारी रहेकाले अन्तिम निष्कर्ष सम्बन्धित निकायको आधिकारिक प्रतिवेदनपछि मात्रै स्पष्ट हुने अपेक्षा गरिएको छ।